کراچی، شہریوں کے اغوا اور تاوان میں ملوث جعلی میجر گرفتار

کراچی میں شہریوں کے اغوا اور جرائم کی دیگر وارداتوں میں مطلوب جعلی میجر سمیت ملزمان کو پولیس نے گرفتار کرلیا۔

تفصیلات کے مطابق کلفٹن اور بوٹ بیسن کے علاقوں میں شہریوں کو نشانہ بنانے والے شارٹ ٹرم اغوا کاروں کے دو ملزمان کو پولیس نے گرفتار کرلیا۔

پولیس حکام کے مطابق گرفتار افراد خود کو حساس ادارے کے افسر ظاہر کرکے شہریوں کو اغوا کرتے اور تاوان وصول کرتے تھے۔

تفتیشی ذرائع کا کہنا ہے کہ ملزمان نے ایک شہری سے 80 لاکھ روپے تاوان بھی وصول کیا تھا۔

ڈی آئی جی ساؤتھ اسد رضا نے بتایا کہ ملزمان کے قبضے سے کار، واکی ٹاکی سیٹس، تین بلٹ پروف جیکٹس، چار موبائل فون اور اسلحہ برآمد کرلیا گیا ہے۔گرفتار افراد کے خلاف ٹیپو سلطان تھانے میں مقدمہ درج کرکے مزید تفتیش شروع کر دی گئی ہے۔