فیض حمید کیخلاف فیصلہ حق کی فتح ہے، وزیر اطلاعات

وفاقی وزیر اطلاعات عطا اللہ تارڑ نے کہا ہے کہ سابق لیفٹیننٹ جنرل فیض حمید کے خلاف عدالت کا فیصلہ ٹھوس شواہد کی بنیاد پر سنایا گیا ہے اور یہ واضح کر دیا گیا ہے کہ قانون سے کوئی بالاتر نہیں۔

اسلام آباد میں میڈیا سے گفتگو کرتے ہوئے وزیر اطلاعات نے کہا کہ آج ریڈ لائن عبور کرنے والے شخص کو سزا دی گئی ہے۔ انہوں نے بتایا کہ ٹرائل کے دوران فیض حمید کو مکمل موقع دیا گیا کہ اپنا دفاع پیش کریں، اپنے گواہان بلائیں اور جو بھی مؤقف رکھنا چاہیں عدالت میں رکھیں۔

عطا تارڑ کا کہنا تھا کہ تمام گواہان کے بیانات قلمبند کرنے اور شواہد کا باریک بینی سے جائزہ لینے کے بعد ایک منصفانہ فیصلہ سامنے آیا۔ "فیض حمید نے اپنی اتھارٹی کا غلط استعمال کیا اور وہ تمام الزامات کے مرتکب پائے گئے۔ ٹاپ سٹی کیس میں بھی انہیں سزا سنائی گئی ہے۔"

انہوں نے کہا کہ فوج میں خود احتسابی کا نظام انتہائی مضبوط ہے، اور آج اس کی ایک اور واضح مثال سامنے آئی ہے۔ وزیر اطلاعات نے دعویٰ کیا کہ فیض حمید نہ صرف اختیارات کا غلط استعمال کرتے رہے بلکہ وہ پی ٹی آئی کے سیاسی مشیر کے طور پر بھی کردار ادا کرتے رہے۔

عطا اللہ تارڑ نے کہا کہ سیاسی معاملات سے متعلق مزید تحقیقات جاری رہیں گی، جبکہ آج آنے والا فیصلہ “حق اور سچ کی فتح” ہے۔