گھریلو ملازمہ سے زیادتی اور تشدد کا کیس، عدالت نے ثمر رانا کو بے قصور قرار دے دیا

لاہور کی ایک مقامی عدالت نے کم عمر گھریلو ملازمہ پر تشدد اور جنسی زیادتی کے ایک مقدمے میں اداکارہ ثمر رانا کو مقدمے سے ڈسچارج کرتے ہوئے انہیں فوری طور پر رہا کرنے کا حکم دے دیا۔

تفصیلات کے مطابق جوڈیشل مجسٹریٹ زیب شہزاد چیمہ کی عدالت میں اسٹیج اداکارہ ثمر رانا کیخلاف درج مقدمے کی سماعت ہوئی جس میں نواب ٹاؤن پولیس نے ملزمہ کو عدالت پیش آیا ہے۔

جوڈیشل مجسٹریٹ زیب شہزاد چیمہ نے ثمر رانا کے خلاف مقدمے کو خارج کر دیا۔ عدالت نے پولیس کی جانب سے اداکارہ کے جسمانی ریمانڈ کی درخواست کو بھی مسترد کر دیا۔

عدالت نے ریمارکس میں کہا کہ ریکارڈ کا جائزہ لینے کے بعد معلوم ہوا ہے کہ ثمر رانا کے خلاف کوئی ٹھوس ثبوت موجود نہیں ہے۔ عدم ثبوت کی بنا پر عدالت نے انہیں مقدمے سے ڈسچارج کر دیا۔

اس سے قبل، اداکارہ کو انویسٹی گیشن پولیس نواب ٹاؤن نے عدالت میں پیش کیا تھا۔ ایف آئی آر کے مطابق، اداکارہ کے گھر میں کام کرنے والی 14 سالہ لڑکی کو مبینہ طور پر پانچ افراد نے زیادتی کا نشانہ بنایا تھا اور اداکارہ پر الزام تھا کہ انہوں نے تشدد کے ذریعے ملازمہ کو خوفزدہ کیا تھا۔

عدالت نے پولیس کو یہ بھی ہدایت دی کہ گرفتاری کے 24 گھنٹے بعد ملزمہ کو عدالت میں پیش نہ کرنے پر تفتیشی افسر کے خلاف کارروائی کی جائے۔