نیویارک کا میئر بنتے ہی نیتن یاہو کی گرفتاری کا حکم جاری کروں گا، زاہران

نیویارک کے میئر کے عہدے کے لیے ڈیموکریٹک پارٹی کے امیدوار زہران ممدانی نے کہا ہے کہ اگر وہ منتخب ہوگئے تو اسرائیلی وزیراعظم نیتن یاہو کی گرفتاری کے لیے پولیس کو ہدایت جاری کریں گے۔

امریکی میڈیا کے مطابق زہران ممدانی کا کہنا تھا کہ وہ بطور میئر عالمی قوانین پر سختی سے عمل درآمد کو یقینی بنائیں گے۔ ان کے بقول عالمی عدالت پہلے ہی نیتن یاہو کے وارنٹ گرفتاری جاری کر چکی ہے اور وہ ان فیصلوں کا احترام کریں گے۔

زہران ممدانی نے مزید کہا کہ نیویارک ایک قانون پسند شہر ہے اور اس کی پہچان یہی ہے کہ یہاں بین الاقوامی اداروں کے فیصلوں کو اہمیت دی جاتی ہے۔

دوسری جانب سابق امریکی صدر ڈونلڈ ٹرمپ نے پیش گوئی کی ہے کہ زہران ممدانی میئر کے انتخابات میں کامیابی حاصل کر سکتے ہیں۔

واضح رہے کہ نیویارک کے میئر کا انتخاب 4 نومبر کو ہوگا، جس میں ڈیموکریٹک امیدوار زہران ممدانی کا مقابلہ ریپبلکن امیدوار کرٹیس سیلوا سے متوقع ہے۔ امکان ہے کہ موجودہ میئر ایرک ایڈمز انتخابات سے دستبردار ہو جائیں گے۔