متنازع امپائر، آئی سی سی نے پاکستان کی درخواست کو مسترد کر دیا

انٹرنیشنل کرکٹ کونسل نے پاکستان کی متنازع امپائر کو ایشیا کپ کے بقیہ میچز سے ہٹانے کی درخواست کو مسترد کردیا۔

رپورٹس کے مطابق پائی کرافٹ نے پاکستانی کپتان سلمان علی آغا کو ہدایت دی تھی کہ وہ بھارتی کپتان سوریہ کمار یادو سے ہاتھ نہ ملائیں۔

 پی سی بی نے اس اقدام کو کھیل کی روح اور آئی سی سی کوڈ آف کنڈکٹ کی خلاف ورزی قرار دیا۔

بھارتی اسپورٹس ویب سائٹ کے مطابق آئی سی سی ذرائع نے کہا ہے کہ پاکستان کے الزامات درست نہیں، بلکہ ایشین کرکٹ کونسل (اے سی سی) کے ایک نمائندے نے ریفری کو ہدایت دی تھی کہ کھلاڑی ہاتھ نہ ملائیں۔

پی سی بی نے اس معاملے پر آئی سی سی، ایم سی سی اور ایشیا کپ ٹورنامنٹ ڈائریکٹر کو بھی خط لکھا ہے، جس میں مؤقف اختیار کیا گیا ہے کہ بھارتی ٹیم کا رویہ فئیر پلے کے اصولوں کے خلاف ہے۔

یاد رہے کہ تنازع اس وقت شروع ہوا جب میچ کے آغاز پر کپتانوں جبکہ اختتام پر بھارتی کھلاڑی پاکستانی کھلاڑیوں سے ہاتھ ملائے بغیر میدان چھوڑ گئے۔ اس پر احتجاجاً کپتان سلمان علی آغا نے اختتامی تقریب میں شرکت نہیں کی۔

پی سی بی چیئرمین اور اے سی سی کے سربراہ محسن نقوی نے ایک بیان میں کہا تھا کہ "کھیل میں سیاست کو شامل کرنا اس کی اصل روح کے خلاف ہے" اور امید ظاہر کی کہ آئندہ فتوحات عزت اور احترام کے ساتھ منائی جائیں گی۔