عوام پر فائرنگ کرنے کا مقدمہ، لیاقت محسود کا گن مین گرفتار

ڈسٹرکٹ سٹی پولیس نے نشتر روڈ رام سوامی کے قریب فائرنگ کے واقعے میں ملوث ڈمپر ایسوسی ایشن کے صدر لیاقت محسود کے گن مین کو گرفتار کرلیا ہے۔

پولیس کے مطابق ملزم سے فائرنگ میں استعمال ہونے والا اسلحہ بھی برآمد کرلیا گیا ہے، جب کہ لیاقت محسود کی گرفتاری کے لیے چھاپے مارے جا رہے ہیں۔

ایس ایس پی سٹی کے ترجمان کے مطابق گرفتار گن مین کی شناخت معراج کے نام سے ہوئی ہے۔ پولیس کا کہنا ہے کہ یہ فائرنگ شہریوں میں خوف و ہراس پھیلانے کے لیے کی گئی تھی۔

واقعے سے متعلق مقدمہ گارڈن تھانے میں درج کیا گیا، جس کا نمبر 451/2025 ہے۔ مقدمے میں لیاقت محسود اور اس کے گارڈز پر دفعہ 147، 148، 149 اور 337-H(ii) کے تحت الزامات عائد کیے گئے ہیں۔

مدعی عبدالقادر ولد عبدالغفار نے اپنے بیان میں بتایا کہ 4 نومبر کی رات نشتر روڈ رام سوامی پر ایک ڈمپر (نمبر TAM-812) نے موٹرسائیکل سوار شاہ زیب کو ٹکر مار کر ہلاک کیا اور اس کی اہلیہ مصباح زخمی ہوگئیں۔ مشتعل افراد نے ڈمپر کو آگ لگا دی تھی۔

واقعے کے بعد حالات کو قابو میں لانے کے لیے علاقہ معززین موقع پر پہنچے، تاہم اسی دوران لیاقت محسود اپنے گن مینوں اور 20 سے 25 مسلح ساتھیوں کے ہمراہ ویگو اور کرولا گاڑیوں میں موقع پر پہنچا اور اندھا دھند فائرنگ کرکے فرار ہوگیا۔

پولیس کے مطابق لیاقت محسود اور اس کے ساتھیوں کی گرفتاری کے لیے مختلف مقامات پر کارروائیاں جاری ہیں۔