ایمان مزاری اور ہادی علی چٹھہ کو آج ہر صورت گرفتار کرنے کا حکم

عدالت نے متنازع سوشل میڈیا پوسٹس سے متعلق مقدمے میں وکیل اور سماجی کارکن ایمان مزاری حاضری اور ان کے شوہر ہادی علی چٹھہ کو 24 گھنٹوں کے اندر گرفتار کرنے کا حکم دے دیا ہے۔

ایڈیشنل ڈسٹرکٹ اینڈ سیشن جج محمد افضل مجوکا نے اسلام آباد پولیس کو ہدایت کی کہ دونوں ملزمان کی فوری گرفتاری یقینی بنائی جائے۔ عدالت نے ڈی آئی جی اسلام آباد جاوید طارق کو اس حوالے سے واضح ہدایات جاری کرتے ہوئے کہا کہ کسی قسم کی تاخیر برداشت نہیں کی جائے گی۔

عدالتی ریمارکس میں کہا گیا کہ ملزمان جہاں بھی موجود ہوں، انہیں تلاش کر کے حراست میں لیا جائے۔ عدالت نے خبردار کیا کہ مقررہ وقت میں گرفتاری نہ ہونے کی صورت میں متعلقہ حکام کے خلاف توہینِ عدالت کی کارروائی کی جا سکتی ہے۔

واضح رہے کہ عدالت نے ایک روز قبل ایمان مزاری اور ہادی علی چٹھہ کی عبوری ضمانت اس بنیاد پر منسوخ کی تھی کہ وہ بار بار عدالتی احکامات کے باوجود پیش نہیں ہوئے۔

عدالت نے نیشنل سائبر کرائمز انویسٹی گیشن ایجنسی کو بھی ہدایت کی ہے کہ گرفتاری کے فوراً بعد دونوں ملزمان کو لاک اپ میں رکھا جائے۔ مزید برآں، عدالت نے حکم دیا کہ اگر فوری طور پر عدالت میں پیشی ممکن نہ ہو تو ملزمان کے بیانات ضابطہ فوجداری کی دفعہ 342 کے تحت ویڈیو لنک کے ذریعے ریکارڈ کیے جائیں۔

یہ مقدمہ سوشل میڈیا پر مبینہ طور پر لسانی بنیادوں پر نفرت اور تقسیم پھیلانے کے الزامات سے متعلق ہے، جس کی تحقیقات جاری ہیں۔