صدر مملکت تاحیات نہ گرفتار ہوں گے اور نہ ہی کوئی مقدمہ بنے گا، آئینی ترمیم کے مسودے میں نئی شق شامل

ستائیسویں آئینی ترمیم کے مسودے میں ایک اہم تبدیلی کرتے ہوئے یہ شق شامل کر لی گئی ہے کہ صدرِ مملکت کے خلاف زندگی بھر کوئی مقدمہ درج یا کارروائی نہیں کی جا سکے گی۔

ذرائع کے مطابق اتحادی جماعتوں کے درمیان مشاورت کے دوران پیپلز پارٹی کے مطالبے پر یہ ترمیم آرٹیکل 248 بی میں شامل کی گئی ہے۔ اس کے تحت صدر مملکت کو تاحیات قانونی کارروائی، گرفتاری یا سزا سے استثنا حاصل ہوگا۔

ذرائع نے بتایا کہ پارلیمانی کمیٹی کے اجلاس میں اتحادی جماعتوں کے درمیان مسودے میں تجاویز شامل کرنے اور نکالنے پر تفصیلی غور کیا گیا، جس کے دوران پیپلز پارٹی نے صدر مملکت کے مکمل استثنا کی تجویز پیش کی۔

ذرائع کا کہنا ہے کہ اس ترمیم کے بعد صدر مملکت کے خلاف کسی بھی نوعیت کی عدالتی یا انتظامی کارروائی ممکن نہیں ہوگی، حتیٰ کہ ان کے منصب چھوڑنے کے بعد بھی کوئی مقدمہ قائم نہیں کیا جا سکے گا۔

سیاسی مبصرین کے مطابق یہ تبدیلی ملک کے آئینی ڈھانچے میں ایک اہم قانونی اور سیاسی اثر ڈال سکتی ہے، کیونکہ اس سے صدر کے عہدے کو پہلے سے کہیں زیادہ تحفظ حاصل ہو جائے گا۔