ٹرمپ کی فتح کے بعد بٹ کوائن کم ترین سطح پر آگیا

عالمی مارکیٹ میں خطرات بڑھنے اور سرمایہ کاروں کے محتاط رویے کے باعث بٹ کوائن کی قیمت میں نمایاں کمی دیکھنے میں آئی ہے۔

قیمتی دھاتوں کی قیمتوں میں شدید اتار چڑھاؤ اور ٹیکنالوجی شیئرز کی فروخت نے کرپٹو مارکیٹ پر دباؤ مزید بڑھا دیا ہے۔

تفصیلات کے مطابق بٹ کوائن کی قیمت کم ہو کر 66 ہزار 675 ڈالر تک آ گئی، جو اکتوبر 2024 کے بعد اس کی کم ترین سطح ہے۔

بعد ازاں بٹ کوائن تقریباً 6.5 فیصد کمی کے ساتھ 67 ہزار 817 ڈالر پر ٹریڈ کرتا رہا۔

اعداد و شمار کے مطابق عالمی سطح پر کرپٹو کرنسی مارکیٹ کی مجموعی مالیت میں ریکارڈ سطح سے اب تک تقریباً 2 ٹریلین ڈالر کی کمی ہو چکی ہے۔ اکتوبر کے آغاز میں مارکیٹ کی مجموعی قدر 4.3 ٹریلین ڈالر سے زائد تھی، جس میں سے صرف گزشتہ ایک ماہ کے دوران تقریباً 800 ارب ڈالر کم ہوئے ہیں۔

رواں ہفتے کے دوران بٹ کوائن کی قیمت میں 11 فیصد کمی ریکارڈ کی گئی ہے، جبکہ سال کے آغاز سے اب تک مجموعی کمی 23 فیصد تک پہنچ چکی ہے۔

دوسری جانب مارکیٹ کی دوسری بڑی کرپٹو کرنسی ایتھر کی قیمت بھی 7 فیصد سے زائد گر کر 1 ہزار 973 ڈالر تک آ گئی ہے۔ ایتھر کو اس ہفتے 14 فیصد جبکہ رواں سال مجموعی طور پر تقریباً 34 فیصد نقصان کا سامنا کرنا پڑا ہے۔

ماہرین کے مطابق سونے اور چاندی جیسی دھاتوں میں بھی غیر معمولی اتار چڑھاؤ دیکھا جا رہا ہے، جہاں خاص طور پر چاندی کی قیمت ایک موقع پر 16 فیصد سے زائد گر گئی۔ اس صورتحال نے کرپٹو مارکیٹ کے منفی رجحان کو مزید تقویت دی ہے۔

سرمایہ کاری کے تجزیہ کار اور کوائن بیورو کے شریک بانی نک پکرین کا کہنا ہے کہ کرپٹو مارکیٹ اس وقت شدید دباؤ کے مرحلے میں داخل ہو چکی ہے۔ ان کے مطابق اگر ماضی کے رجحانات کو دیکھا جائے تو یہ محض عارضی کمی نہیں بلکہ ایک طویل ری سیٹ کا آغاز ہو سکتا ہے، جس میں مہینوں لگ سکتے ہیں، چند ہفتے نہیں۔