پی ٹی آئی کی قیادت کون کررہا ہے؟ بیرسٹر گوہر نے بتا دیا

پاکستان تحریک انصاف کے چیئرمین بیرسٹر گوہر نے واضح کیا ہے کہ مائنس ون کا کوئی فارمولہ قابلِ عمل نہیں، پارٹی کی قیادت اب بھی بانی پی ٹی آئی کے ہاتھ میں ہے اور میں صرف ان کا نمائندہ ہوں۔

پریس کانفرنس میں انہوں نے کہا کہ اب تک جتنے بھی فیصلے ہوئے ہیں وہ بانی پی ٹی آئی کی مشاورت اور رہنمائی سے کیے گئے، آئندہ بھی یہی طرزِ عمل جاری رہے گا۔

انہوں نے زور دیا کہ بانی پی ٹی آئی جمہوریت کے فروغ اور ملک میں سیاسی استحکام کے لیے مسلسل کوشاں ہیں۔

بیرسٹر گوہر کا مزید کہنا تھا کہ اگر حالات کو سختی سے قابو کرنے کی کوشش کی گئی تو ملک کو مزید نقصان پہنچے گا۔ ان کے مطابق پنجاب سب سے بڑا صوبہ ہے مگر وہاں کے عوام بدترین مشکلات کا سامنا کر رہے ہیں جبکہ سیلاب کے دوران حکومت صرف تصویری مہم تک محدود رہی۔

انہوں نے اپیل کی کہ سیاست سے بالاتر ہو کر سیلاب متاثرین کی مدد کی جائے تاکہ مشکلات میں گھرے شہریوں کو ریلیف مل سکے۔