پنجاب میں کوئی احتجاج ہوا اور نہ دکان بند ہوئی، مریم نواز

پاکستان تحریکِ انصاف کی جانب سے اتوار کو ملک بھر میں دی گئی وہیل جام اور شٹر ڈاؤن کی کال پنجاب میں مؤثر ثابت نہ ہو سکی، جس پر وزیراعلیٰ پنجاب مریم نواز نے اپوزیشن اتحاد کو تنقید کا نشانہ بنایا۔

وزیراعلیٰ مریم نواز نے سماجی رابطے کی ویب سائٹ ایکس (سابق ٹوئٹر) پر اپنے پیغام میں کہا کہ پنجاب میں نہ کوئی احتجاج ہوا اور نہ ہی شٹر ڈاؤن نظر آیا۔ انہوں نے طنزیہ انداز میں لکھا:

“زیرو احتجاج، زیرو شٹر ڈاؤن۔”

دوسری جانب اپوزیشن اتحاد تحریکِ تحفظِ آئینِ پاکستان (ٹی ٹی اے پی) نے بھی یہ تسلیم کیا ہے کہ پنجاب میں احتجاج کا مطلوبہ اثر سامنے نہیں آیا۔ اتحاد کے ترجمان اخوندزادہ حسین کے مطابق ملک کے دیگر صوبوں کے مقابلے میں پنجاب سب سے کم متحرک رہا۔

ٹی ٹی اے پی نے جنوری میں عام انتخابات میں مبینہ دھاندلی کے خلاف ملک گیر احتجاج، ٹرانسپورٹ کی بندش اور تجارتی سرگرمیاں معطل کرنے کا اعلان کیا تھا۔ پارٹی دعوے کے مطابق بلوچستان، خیبرپختونخوا اور سندھ کے بعض علاقوں میں کاروبار بند رہا اور اہم شاہراہوں پر رکاوٹیں دیکھنے میں آئیں، تاہم پنجاب میں صورتحال مختلف رہی۔

لاہور سمیت پنجاب کے کئی شہروں میں اس روز بسنت کی تقریبات جاری رہیں، جبکہ کشمیر ڈے اور بسنت کی تعطیلات کے باعث طویل ویک اینڈ ہونے کی وجہ سے معمولاتِ زندگی متاثر نہ ہو سکے۔

میڈیا میں سامنے آنے والی سرگرمیوں میں پنجاب کے بعض علاقوں میں چند افراد کی مشعل بردار واکس دکھائی گئیں، تاہم کوئی بڑا احتجاج یا ریلی دیکھنے میں نہیں آئی۔

اخوندزادہ حسین نے کہا کہ بلوچستان میں احتجاج کو بھرپور کامیابی ملی، جہاں کئی اضلاع میں سڑکیں بند اور کاروبار معطل رہا، جبکہ خیبرپختونخوا میں پارٹی کے مضبوط حلقوں میں ضلعی سطح پر ریلیاں نکالی گئیں۔

پنجاب میں کم سرگرمی کی وجہ بتاتے ہوئے انہوں نے صوبائی حکومت پر سخت کنٹرول اور پابندیوں کا الزام لگایا، جس کے باعث سیاسی کارکنوں کو متحرک ہونے کا موقع نہیں ملا۔

پی ٹی آئی پنجاب کے ترجمان اور رکنِ صوبائی اسمبلی بریگیڈیئر (ر) مشتاق نے مؤقف اختیار کیا کہ احتجاج میں شرکت رضاکارانہ تھی اور کسی قسم کی زبردستی یا جارحانہ حکمتِ عملی اختیار نہیں کی گئی۔ ان کا کہنا تھا کہ مشعل بردار واکس آخری وقت میں شامل کی گئیں اور مقصد پُرامن احتجاج ریکارڈ کرانا تھا۔