ڈکی بھائی کی درخواست ضمانت سے متعلق بڑی پیشرفت

لاہور ہائی کورٹ میں یوٹیوبر سعد الرحمٰن المعروف ڈکی بھائی کی ضمانت کی درخواست سماعت کے لیے مقرر کر دی گئی ہے۔

یہ درخواست پیر کے روز جسٹس شہرام سرور سنیں گے۔ اس سے قبل جسٹس فاروق حیدر نے کیس کی سماعت سے معذرت کر لی تھی۔

درخواست میں این سی سی آئی اے اور دیگر متعلقہ فریقوں کو شامل کیا گیا ہے۔ ڈکی بھائی نے اپنے خلاف جوئے کی ایپ کی تشہیر کے مقدمے میں ضمانت کی استدعا کر رکھی ہے۔

درخواست گزار کا مؤقف ہے کہ انہیں غیر ملکی سفر کے دوران ایئرپورٹ سے حراست میں لیا گیا، حالانکہ این سی سی آئی اے نے انہیں نہ تو کوئی نوٹس بھیجا اور نہ ہی پہلے کبھی طلب کیا۔

درخواست میں مزید بتایا گیا ہے کہ سعد الرحمٰن کو گرفتاری کے بعد دس دن تک جسمانی ریمانڈ پر این سی سی آئی اے کی تحویل میں رکھا گیا۔