خیبرپختونخوا میں ایمرجنسی اور گورنر راج کے نفاذ پر وفاقی حکومت کو نوٹس جاری

پشاور ہائیکورٹ نے خیبرپختونخوا میں ایمرجنسی کے نفاذ اور گورنر راج کے خلاف پاکستان تحریک انصاف کی درخواست پر وفاقی حکومت، اٹارنی جنرل اور دیگر فریقین کو نوٹس جاری کرتے ہوئے مزید سماعت 10 نومبر تک ملتوی کردی۔

پی ٹی آئی کے چیئرمین بیرسٹر گوہر علی خان کی جانب سے دائر درخواست کی سماعت جسٹس اعجاز انور اور جسٹس فہیم ولی پر مشتمل بینچ نے کی۔

درخواست میں مؤقف اختیار کیا گیا ہے کہ صوبے میں ایمرجنسی اور گورنر راج کا نفاذ غیر آئینی اور غیر قانونی ہے۔ بیرسٹر گوہر نے عدالت سے استدعا کی ہے کہ اس اقدام کو کالعدم قرار دے کر منتخب صوبائی حکومت کے آئینی اختیارات بحال کیے جائیں۔

درخواست گزار نے صوبے میں تحریک انصاف کے خلاف مبینہ انتقامی اقدامات روکنے کی بھی استدعا کی اور معاملے کی جلد سماعت کی درخواست کی۔

تاہم عدالت نے وفاقی حکومت، اٹارنی جنرل اور دیگر فریقین کو نوٹس جاری کرتے ہوئے کیس کی مزید سماعت 10 نومبر تک ملتوی کردی۔