کراچی میں رکشہ چھیننے والے میاں بیوی گرفتار

کراچی : پولیس نے رکشے چھیننے والے گینگ میں شامل میاں بیوی کو دوران واردات پکڑ لیا، ملزمان ایک ڈرائیور سے اسلحہ کے زور پر اس کا رکشہ چھین کر فرار ہورہے تھے۔

اس حوالے سے پولیس حکام نے میڈیا کو بتایا کہ کراچی کے علاقے گلشن معمار سے رکشہ اسنیچر گینگ میں شامل میاں بیوی کو رنگے ہاتھوں گرفتار کیا گیا ہے ملزمان نیازعلی اور اس کی بیوی نے ملیر سے گبول ٹاؤن کیلئے رکشہ بک کرایا تھا۔

پولیس کے مطابق لیبراسکوائر گلشن اقبال پر پہنچ کر ملزمان نے ڈرائیور کی کنپٹی پر پستول رکھ دیا اور اسلحے کے زور پر رکشہ چھننے کی کوشش کی،اس دوران قریب ہی گشت پر موجود پولیس اہلکار بھی پہنچ گئے جنہوں نے بروقت کارروائی کر کے دونوں ملزمان کو گرفتار کرلیا۔

پولیس نے اس بات کا بھی انکشاف کیا ہے کہ اب تک چھینے گئے رکشوں میں شہر بھر میں منشیات سپلائی کی جاتی ہے، گروہ کا طریقہ واردات یہ ہے کہ منشیات رکشے میں ڈال کر خاتون کی مدد سے مقررہ مقمات پر پہنچائی جاتی ہے۔

پولیس کے مطابق ملزمان کے قبضے سے غیر ملکی ساختہ 30 بور کا پستول برآمد ہوا ہے، کارروائی کے دوران پولیس نے ڈیڑھ کلو فائن کوالٹی کی چرس بھی قبضے میں لے لی ہے۔

گینگ میں خاتون سمیت 5ملزمان شامل ہیں جن کی گرفتاری کیلئے چھاپے مارے جارہے ہیں، ملزمان نے منشیات فروشی کے علاوہ شہر کے مختلف علاقوں میں چھینا جھپٹی کی درجنوں وارداتوں کا بھی اعتراف کیا ہے۔