اسلام آباد: وزیراعظم عمران خان کے تمام معاونین خصوصی کی تعیناتیاں اسلام آباد ہائی کورٹ میں چیلنج کر دی گئیں۔
تفصیلات کے مطابق وزیراعظم عمران خان کے15 معاونین خصوصی کی تعیناتیاں چیلنج کی گئی ہیں جن میں نعیم الحق، فردوس عاشق اعوان، ندیم افضل، علی نواز اعوان ، زلفی بخاری، شہزاد اکبر ،معید یوسف اور عثمان ڈار شامل ہیں۔ وزیراعظم عمران خان کے تمام معاونین خصوصی کی تعیناتیوں کےخلاف درخواست ینگ جرنلسٹ ایسوسی ایشن کے چیئرمین فرخ نواز بھٹی کی جانب سے دائر کی گئی ہے جس میں وزیراعظم عمران خان سمیت تمام معان خصوصی کو فریق بنایا گیا ہے۔
درخواست میں مؤقف اپنایا گیا کہ معید یوسف امریکہ کے مختلف تھینک ٹینکس کے ساتھ کام کرچکے ہیں،معید یوسف کی تعیناتی ملک کے مفاد کے برعکس ثابت ہوسکتی ہے،رولز آف بزنس 1973 کے رول 4(6) کے مطابق وزیراعظم کے پاس معان خصوصی تعینات کرنے کا اختیار ہے لیکن معاونین خصوصی کو فیڈرل منسٹر یا اسٹیٹ منسٹر کا درجہ خلاف قانون دیا گیا، کسی بھی معان خصوصی کی تعیناناتی آئین پاکستان کے آرٹیکل 92 کے تحت نہیں کی گئی۔
درخواست میں استدعا کی گئی کہ وزیراعظم کے معاونین خصوصی کو وفاقی وزیر اور وزیرمملکت کا درجہ غیر قانونی قرار دیا جائے اور وزیراعظم عمران خان اور کیبنٹ ڈویژن کے اقدام کو غیر قانونی قرار دیا جائے جبکہ نیب کو تمام فریقین کیخلاف کاروائی کا حکم بھی دیا جائے۔
