کراچی: سابق وزیر اعظم شہید محترمہ بے نظیر بھٹو اور سابق صدر آصف علی زرداری کی بڑی بیٹی بختاور بھٹو کا اپنی منگنی سے متعلق بیان سامنے آگیا اور انہوں نے امریکا میں کسی بھی خاندان سے وابستگی کی تردید کردی ہے۔
سماجی رابطے کی مائیکرو بلاگنگ ویبسائٹ ٹوئٹر پر اپنے ایک بیان میں بختاور بھٹو کا کہنا تھا بدقسمتی سے منگنی کے کارڈ پہلے ہی لیک ہوگئے، آپ تمام لوگوں کی نیک خواہشات اور نیک تمناوں کا بے حد شکریہ۔
بختاور بھٹو نے مزید کہا کہ ان کی امریکا میں کسی بھی خاندان سے کوئی وابستگی نہیں ہے جس کا حوالہ میڈیا پر دیا جارہا ہے۔
انہوں نے مزید کہا کہ امید ہے اس سے تمام غلط معلومات ختم ہوجائیں گی اور ساتھ ہی انہوں نے پیپلز پارٹی کے آفیشل ٹوئٹر اکاؤنٹ کی جانب سے شیئر کیے جانے والا ایک اہم معلوماتی بیان بھی جاری کیا ہے۔
پیپلز پارٹی کے جاری بیان میں کہا گیا ہے کہ بختاور بھٹو کی منگنی 27 نومبر کو محمود چوہدری کے ساتھ طے کی گئی ہے جو یونس چوہدری اور ثریا چوہدری کے چھوٹے بیٹے ہیں۔
پیپلز پارٹی کے بیان کے مطابق لاہور سے تعلق رکھنے والے یونس چوہدری 1973 میں متحدہ عرب امارات گئے جہاں انکے بیٹے محمود چوہدری 27 جولائی 1988 کو ابو ظہبی میں پیدا ہوئے۔
محمود چوہدری نے ابتدائی تعلیم ابو ظہبی سے حاصل کی جبکہ اعلی تعلیم برطانیہ سے حاصل کی ہے۔
محمود چوہدری اپنے والد کے کنسٹرکشن کے کاروبار سے وابستہ ہیں جبکہ ان کے والد یونس چوہدری نے بڑی محنت کے بعد کنسٹرکشن اور ٹرانسپورٹ کے کاروبار کی بنیاد رکھی تھی۔
