سال 2021 میں مداحوں سے بچھڑنے والی شوبز شخصیات

رواں سال پاکستان میں جہاں متعدد شخصیات کورونا کے باعث انتقال کر گئیں، وہیں بعض افراد دیگر بیماریوں سے بھی زندگی کی جنگ ہار گئے۔

گزشتہ برس کی طرح سال 2021 میں بھی جہاں عام لوگ کورونا سمیت دیگر بیماریوں کے باعث زندگی کی بازی ہار گئے، وہیں اہم شوبز، سیاسی و سماجی شخصیات بھی مداحوں سے بچھڑیں۔

رواں سال ڈراما ساز حسینہ معین، اسما نبیل اور عمر شریف سمیت متعدد نامور شوبز شخصیات مداحوں سے بچھڑیں۔

اس رپورٹ میں ہم ان چند معروف شخصیات کو سال کے اختتام پر یاد کر رہے ہیں، جو سال 2021 میں مداحوں سے بچھڑیں۔

شان شاہد کی والدہ نیلو بیگم

ماضی کی معروف اداکارہ اور شان شاہد کی والدہ نیلو فر بیگم 30 جنوری 2021 کو انتقال کر گئی تھیں۔

لولی وڈ کے ’رانجھا‘ اعجاز درانی

پاکستانی فلموں کے رومانوی ہیرو کہلائے جانے والے اور 1970 کی مقبول فلم ’ہیر رانجھا‘ میں ’رانجھا‘ کا کردار ادا کرنے والے اداکار اعجاز درانی طویل علالت کے بعد یکم مارچ کو انتقال کر گئے تھے۔

پاکستان کی پہلی ٹی وی میزبان کنول نصیر

پاکستان کی پہلی ٹی وی میزبان کا اعزاز رکھنے والی ریڈیو اناؤنسر کنول نصیر کچھ عرصہ علیل رہنے کے بعد 26 مارچ کو 70 سال کی عمر میں انتقال کر گئی تھی۔

پاکستانی ڈراموں کی ’ملکہ‘ حسینہ معین

پاکستانی ڈراموں کی ’ملکہ‘ کہلائی جانے والی ڈراما نگار حسینہ معین 79 برس کی عمر میں 27 مارچ کو فانی دنیا سے رخصت ہوئیں۔

معروف لوک گلوکار شوکت علی

صوفی و لوک گلوکار شوکت علی کچھ عرصہ علیل رہنے کے بعد 2 اپریل کو جگر کے عارضے کے باعث انتقال کر گئے تھے۔

اداکارہ سنبل شاہد

سینئر اداکاراؤں بشریٰ انصاری اور اسما عباس کی بہن اداکارہ سنبل شاہد 6 مئی کو کورونا کے باعث انتقال کرگئی تھیں۔

اداکارہ نائلہ جعفری

پاکستان ٹیلی ویژن ڈرامہ انڈسٹری کی سینئر اداکارہ نائلہ جعفری 17 جولائی کو کراچی میں انتقال کر گئ تھیں، نائلہ جعفری گزشتہ چھ سال سے کینسر کے مہلک مرض میں مبتلا تھیں۔

ماضی کی مقبول اداکارہ طلعت صدیقی

پاکستانی فلم انڈسٹری اور ٹیلی ویژن کی نامور اداکارہ طلعت صدیقی 82 برس کی عمر میں9 مئی کو انتقال کرگئی تھیں۔

معروف مزاح نگار فاروق قیصر عرف انکل سرگم

معروف فنکار و مزاح نگار فاروق قیصر عرف انکل سرگم 15 مئی کو حرکت قلب بند ہونے سے 75 برس کی عمر میں انتقال کر گئے تھے۔

معروف گلوکار سنی بینجمن جان المعروف ایس بی جان

صدارتی ایوارڈ یافتہ معروف گلوکار و غزل گائک سنی بینجمن جان المعروف ایس بی جان 5 جون کو مداحوں سے بچھڑے۔

گلوکار و موسیقار فرہاد ہمایوں

نومبر 2018 میں برین ٹیومر کا شکار ہونے والے معروف گلوکار و موسیقار فرہاد ہمایوں 8 جون کی صبح انتقال کر گئے تھے۔

سینئر ٹی وی اداکارہ خورشید شاہد

پاکستان ٹیلی ویژن (پی ٹی وی) کی سینئر اداکارہ اور اداکار سلمان شاہد کی والدہ، خورشید شاہد 95 برس کی عمر میں لاہور میں 27 جون کو انتقال کر گئی تھیں۔

اداکار انور اقبال

اردو اور سندھی زبان کے کئی ڈراموں میں یادگار کردار ادا کرنے والے پاکستان کے سینئر اداکار انور اقبال بلوچ علالت کے باعث یکم جولائی کو انتقال کرگئے تھے۔

لیجنڈری اداکارہ سلطانہ ظفر

’تنہائیاں’ اور ’ان کہی’ جیسے مقبول ترین ڈراموں میں اداکاری کرنے والی پاکستان کی لیجنڈری اداکارہ سلطانہ ظفر 16 جولائی کو انتقال کرگئی تھیں۔

ڈراما نگار اسما نبیل

خانی، باندی، دمسی، خدا میرا بھی ہے اور سرخ چاندنی‘ جیسے ڈراموں کی کہانی لکھنے والی ڈراما نگار اسما نبیل طویل عرصے تک کینسر میں مبتلا رہنے کے بعد 2 جولائی کو انتقال کر گئی تھیں۔

اداکارہ دردانہ بٹ

سینئر اداکارہ دردانہ بٹ 12 اگست کو کورونا کے باعث 83برس کی عمر میں کراچی میں انتقال کرگئی تھیں۔

سینئر اداکار طلعت اقبال

سینئر اداکار طلعت اقبال امریکا کے ہسپتال میں علالت کے باعث 24 ستمبر کو انتقال کرگئے تھے۔

کامیڈی کے بے تاج بادشاہ عمر شریف

لیجنڈری کامیڈین، اداکار و میزبان عمر شریف 66 سال کی عمر میں 2 اکتوبر کو جرمنی میں انتقال کر گئے تھے، انہیں علاج کے لیے امریکا منتقل کیا جا رہا تھا کہ وہ خالق حقیقی سے جا ملے تھے۔

ایوارڈ یافتہ ڈھول استاد پپو سائیں

صوبہ پنجاب کے دارالحکومت لاہور سے تعلق رکھنے والے ایوارڈ یافتہ ڈھول استاد ذوالفقار علی المعروف ’پپو سائیں‘ طویل عرصے تک علیل رہنے کے بعد 8 نومبر کو انتقال کر گئے تھے۔