روس نے امریکہ کے ساتھ جوہری مذاکرات ملتوی کردیے

ماسکو:روس اورامریکہ کے درمیان جوہری تخفیف اسلحہ کے حوالے سے مصرمیں ہونے والے مذاکرات ملتوی کردیے گئے ۔

روس کی وزارتِ خارجہ اورامریکی سفارت خانے نے الگ الگ بیان میں ان مذاکرات کے ملتوی ہونے کی اطلاع دی ۔دونوں ممالک کے حکام 29 نومبرسے6 دسمبرتک مصرکے دارالحکومت قاہرہ میں ملاقات کرنے والے تھے تاکہ جوہری ہتھیاروں میں کمی کے نیواسٹارٹ معاہدے کے تحت معائنے دوبارہ شروع کرنے پر تبادلہ خیال کیا جاسکے۔

ان مذاکرات کوکووِڈ19کے وبائی مرض کی وجہ سے مارچ 2020 میں معطل کردیا گیا تھا۔

وزارت نے کہاکہ قاہرہ میں امریکہ روس نیواسٹارٹ معاہدے کے تحت دوطرفہ مشاورتی کمیشن کا پہلے سے طے شدہ اجلاس اب ان (29 نومبر سے 6 دسمبر) تاریخوں پرنہیں ہوگا۔ اس کو بعد کی تاریخ تک ملتوی کردیا گیا ہے۔

روس کے نائب وزیرخارجہ سرگئی ریابکوف نے کسی پیش رفت کی توقعات کومسترد کردیا تھاحالانکہ یہ مذاکرات اس بات کی علامت تھے کہ دونوں فریق کم سے کم بات چیت کو برقرار رکھنا چاہتے ہیں۔اس وقت امریکہ اورروس کے درمیان سرد جنگ کے بعد سے دوطرفہ تعلقات اپنی کم ترین سطح پرہیں۔